Gatazkaren konponbidean sinesten duten guztien artean mahai bat osatzeko proposamena egin dio Otegik Ibarretxeri

Ibarretxek bere plana "era eraikitzaile eta positibo" batean proposatu duela esanez hasi du bere hitzaldia Arnaldo Otegik, baina zenbait ñabardura mahai gainean jarriko dituela iragarri du. "Abiapuntu berri bat behar du herri honek. Gu ez gatoz bat Ibarretxe jaunaren proposamenarekin, hau ez baita bakoitzak bere proiektu politikoa mahai gainean jartzeko garai politikoa", esan du Otegik.

Otegiren esanetan, ezker abertzaleak orain dela 25 urte esandakoa berresten ari dela adierazi du Otegik, eta eztabaida irabazi egin duela. "Gernikako Estatutuaren defuntzio akta jasotzera etorri gara. Poza ematen digu, azken batean, ziklo berri baterako ateak irekitzen hasiak baikara, baina horretarako ezinbestekoa da gatazkari beste parametro batzuetatik heltzea", nabarmendu du.

"Helburua gatazka gainditzea da"

Sozialista Abertzaleak taldeko eledunaren esanetan, garai politiko honen helburua gatazka gainditzea da, eta "hor jarri behar ditugu indarrak Ibarretxe jauna, eta eztabaida beste leku batera eraman. Nola sortu Euskal Herrian proiektu poltiko guztiak berdintasunean plazaratzeko eta herritarrek beren etorkizuna libreki erabakitzeko egoera bat?".

Hala, gatazka gainditze aldera, ezker abertzaleak eskaintza bat egiten duela esan dio Otegik Ibarretxeri, "malgutasun eta zabaltasun osoz". Otegiren iritziz, Euska Herriaren esistentzia, lurraldetasuna, autodeterminazioa, eskubide zibil eta politikoen hitzarmena eta herri galdeketa dira "gatazka konponbidera gerturatzen gaituzten kontzeptuak".

Abiapuntua hori dela esan du SAko legebiltzarkideak, eta "horrela sinesten dugunok, mahai batean jar gaitezen hitz egiteko, bide berri bat irekitzeko. Hori da gatazkaren mamiari eta prozesu politikoari benetan heltzen dion mahaia". Halaber, herri galdeketa indarkeriarik gabeko egoera politiko batean egin beharko litzateke azpimarratu du.