Gotzon Sanchez aitaren eta futbol talde bateko jarraitzailearen rolean ageri zen iragarki horretan. Dignidad y Justiciak enpresari eskatu dio ken dezala iragarkia, eta hala egin duela baieztatu dio Coca-Colak Europa Press agentziari.
Enpresak azaldu duenez, ez zuen Sanchezen "curriculuma" ezagutzen, argudiatuta iragarkia egin duen ekoizpen etxea arduratzen dela aktoreak kontratatzeaz. "Terrorismoaren biktimei eta minduta sentitu diren guztiei" barkamena eskatu die enpresak.
Sanchezek elkartasuna adierazi izan die euskal presoei, eta hori argudiatu du Dignidad y Justiciak iragarkia ken dezatela eskatzeko. Esaterako, Sanchez izan zen aurkezleetako bat Tantaz Tantak iazko irailean eginiko ekitaldi batean.
"Non dago arazoa?"
Sanchezek ETB2ko ETB hoy saioan hitz egin du, eta ziurtatu "gatazkaren konponbidearen eta giza eskubideen errespetuaren alde" lan egiten jarraituko duela. Bere ibilbide profesionalari kalte egingo dion galdetuta, Sanchezek esan du nahiago duela horretan ez pentsatu eta lanean jarraitu.
