Gaurtik aurrera, BERRIA.INFO-n parte hartzeko eta ekarpenak egiteko aukera handiagoa izango dute irakurleek: edizio jarraituko albiste den-denetan edukiko dute iruzkinak idatzi eta iritzia emateko aukera. Orain arte, albiste kopuru mugatu batean baino ez zen aukera hori, eta gunearen kudeatzaileek erabakitzen zuten zein albistetan egon zitekeen interesgunea.
Gaur martxan jarri den iruzkinetarako sistemarekin, Berriketan.info sare sozialaren bidez egin beharko dira ekarpenak; hau da, iruzkinak egin nahi dituen irakurleak Berriketan.info-n erregistratu beharko du, eta, horren ondoren, nahi duen albistean izango du ekarpena egiteko modua. Hots, irakurleek erabakiko dute zein den beren interesgunea.
Dagoeneko irakurle askok emana dute izena Berriketan.info sare sozialean, eta albiste jakin batzuei lotuta ez bada ere, beren ekarpenak egiteko baliatzen dute —gaur goizean 782 kide zituen Berriketan.info sare sozialak—.
Eztabaida zuzena helburu
Hitza.info-ren eremuko guneetan, hau da, herri eta eskualdeetako albistegi digitaletan, lehendik ere bazegoen albiste guztietan iruzkinak egiteko aukera, baina haietan ere aurrerantzean Berriketan.info-ren bidez egin beharko dira.
Izan ere, BERRIA Taldeko komunikabideen helburua beti izan da irakurleen parte hartzea bultzatzea eta haien ekarpena jasotzea; nolabaiteko elkarrizketa bat sortzea. Horregatik sortu ziren inkesta eta eztabaidaguneak, iruzkinak egiteko aukera eta Berriketan.info sare soziala. Baina parte hartzea ez ezik, eztabaida zuzena bultzatu nahi izan da, anonimotasunean babestutako zabarkeriarik gabekoa.
Hain justu, horregatik zen mugatua BERRIA.INFOn ekarpenak egiteko aukera: iruzkinak moderatu egiten zirelako, eta, ondorioz, guneko arduradunentzat kudea ezina zelako albiste guztietara zabaltzea. Ekarpenak Berriketan.info-ren bidez egin behar izateak, ordea, autoerregulazioa ekarriko du, BERRIA.INFOra, batetik, eta Hitza.info-ren eremuko guneetara, bestetik.
Era berean, Berriketan.info sare soziala bera indartzen lagun dezake iruzkinetarako sistema berriak: izango dira albisteak iruzkintzen hasi eta pixkanaka sarean bertan bestelako ekarpenak egingo dituzten irakurleak, eta BERRIAko zein Hitzetako kazetariekin elkarrizketan gaur-gaurko gaien eraikuntzan beren alea jarriko dutenak.
Sakelakoetara egokituta
Nolanahi ere, ez da hori BERRIA.INFO eta Hitza.info webguneen inguruan datozen egunetan izango den berritasun bakarra. Batetik, Berria.info-ren sakelakoetarako egokitzapena martxan izango da hilaren 30ean, eta, horrenbestez, errazagoa izango da gailu txikien bidez gune horretan ibiltzea.
Bestetik, herrietako eta eskualdeetako Hitza.info webguneen bilgune den Hitza.info gune nagusia ere abian da. Gune horretan, Hitza txikiagoen ekarpenak biltzen dira, baina, horrez gain, baita proiektuari buruzko informazioa eta tokian tokiko albistegi digitalen direktorioa ere.
