Guardia Zibilak atxiloketa bat egin du gaur, Andoainen (Gipuzkoa). 24 urteko gizonezko gazte bat atzeman dute Karrika auzunean, jihadarekin lotura duelakoan. Propaganda egitea egozten diote, materiala zabaltzea. Hainbat kontaktu ei zituen, eta, Espainiako Barne Ministerioaren arabera, asmoa zuen "gatazka lekuetara" joateko, han ekimena hartzeko.
Juan Ignacio Zoidok eman du operazioaren berri, ohar batekin. Jakinarazi dutenez, Andoainen gaztea bizi den etxebizitza arakatzen ari dira, "haren jarduera kartsuaren ebidentzia guztiak batzeko".
Sare sozialetan hainbat profil sortu zituen atxilotuak, Zoidoren arabera. Haiekin materiala bildu eta zabaltzen zuen, eta, azaldu dutenez, kontaktuak zituen "Espainian zein handik kanpo". Siriatik eta Iraketik jasotzen zuen propagandarako materiala. Iturri horrek zabaldu duenez, jihadari batzeko jende bila ere aritzen zen.
