Gazte bat atxilotu dute Zornotzan, kale erasoekin lotura duelakoan

Eusko Jaurlaritzako Herrizaingo Sailak jakinarazi duenez, Ertzaintzak Igor Zearreta Garai atxilotu du Zornotzan (Bizkaia). Duela bost urte Soraluzen (Gipuzkoa) gertatu ziren kale erasoekin zerikusia duelakoan atxilotu dutela jakinarazi dute. Atxiloketa Espainiako Auzitegi Nazionalak agindu du.

Zearretak Ajangizko Maier enpresan egiten du lan, eta atxilotu ostean hara eraman dute, lantokiko haren armairua arakatzeko. Enpresako zenbait langilek agerraldia egin dute 12:30ean, lantegiaren aurrean. «Ertzaintzaren inpunitatea» salatu dute, eta enpresan egindako miaketa legezkoa ez dela izan salatu dute, «ez dutelako inolako epai agindurik erakutsi». Lankidearen egoerarengatik kezkatuta agertu dira; «inkomunikazioaren beldur gara; horrek berekin dakarren inpunitate egoeraren beldur». Miaketa egitera sartu diren ertzainek langileak jo dituztela salatu dute langileek, eta miaketa lekukorik gabe egin dutela.

Ertzaintzaren arabera, «erabat koordinatuta» burua estalita zuten pertsona batzuek molotov koktelak bota zituzten Ertzaintzaren furgoneta baten aurka etaBBVA bankuaren aurka.

Rodolfo Ares Herrizaingo sailburuak esan du ertzaintzak «lan ona» egin duela, eta ohartarazi du operazioak irekita segitzen duela.