Trafiko istripu larri bat izan da gaur Erriberrin (Nafarroa) bi autoren artean, eta 23 urteko gazte iruindar bat hil da. Istripua N-121 errepidean gertatu da, 39. kilometroan. Hildakoa elkar jo duten bi autoetako bateko gidaria da. Beste autoan gizon bat eta emakume bat zihoazen. Gizonak zauri larriak ditu, eta helikopteroz eraman dute Iruñera, Nafarroako Ospitalera.
Kolpearen ondorioz, suhiltzaileen laguntza behar izan dute barruan zeudenak ateratzeko. Tafallako eta Azkoiengo suhiltzaileak aritu dira lan horretan. Errepidea moztuta egon da. Guardia Zibilak hartu du gertatu dena ikertzeko ardura.
