Genero indarkeria eta sexu erasoak jasaten dituzten emakumeei "arreta hobea" eskaintzeko asmoz, Erakundeen Arteko Jarduerarako eta Koordinaziorako I. Udal Protokoloa osatu dute Tolosan (Gipuzkoa). Askotariko eragileek izenpetu dute protokoloa; tartean daude udala, Osakidetza, Asuncion klinika, Ertzaintza, Udaltzaingoa, Gizarte Zerbitzuak, Migrazio Saila (Tolosaldea Garatzen), Bilgune Feminista eta eraso dieten zenbait emakume.
Ezinbestekotzat jo dute indarkeriaren eta erasoen aurkako "kontzientzia aktiboa" izatea, eta uste dute protokoloak horretan lagunduko duela. Zehaztu dutenez, protokoloaren helburua "etxeko tratu txarren eta sexu indarkeriaren biktima diren emakumeei" laguntzen diharduten erakundeen arteko koordinazioa hobetzea da, besteak beste. Emakume horiei babes eta arreta osoa bermatzea —osasun arloan, polizialean, judizialean eta gizarte arloan—.
Eragile guztien artean adostutako protokoloa da; hala ere, "etengabe hobetzeko helburua" duenez, aldatzen joango da, "unean uneko beharrei egokituz". Horrez gain, lan mahai iraunkor bat eratuko dute, protokoloa berrikusi eta zabaltzeko.
