Gerry Adams Sinn Fein Irlandako alderdiko presidenteak uste du Arnaldo Otegi ezker abertzaleko kideak Euskal Herriko prozesuan parte hartu beharko lukeela, "bake prozesuarekin konprometituta baitago eta, beraz, lehenbailehen egon beharra du horretan. Haren pausorik gabe ez ginateke egoera honetan egongo". Rac 1 irrati katean egin ditu adierazpenak Adamsek, gaur.
Espainiako Auzitegi Nazionalak Bateragune auzian hamar urteko kartzela jarri zion Otegiri joan den irailaren 16n, ETAko buruzagitzat jota.
Adams bera ere hainbat aldiz espetxeratu zuten 1972 eta 1978 artean, IRAko burua zela egotzita, eta Ipar Irlandako 1998ko bake akordioan funtsezko eginkizuna bete zuen Sinn Feineko agintari bezala.
