Bozka bakarragatik -14 kontra eta 13 alde- baztertu dute Frantziako Asanblean hizkuntza gutxituen aldeko talde ekologistaren lege proposamena. Paul Molac UDBko parlamentariak aurkeztu zuen proposamenean hezkuntza elebidunean hizkuntza gutxituetan ematen den ordu kopurua handitzeko aukera aztertzen zen, baita ikastetxe pribatuak finantzatzeko erabakia tokian tokiko erakundeen esku izatea ere. Neurri horrek zuzenean eragingo ziokeen Seaskari, botere publikoek ikastolak diruz laguntzeko aukera irekiko baitzuen. Frantziako Gobernuak ebatzi du neurri horiek ez direla Frantziako konstituzioarekin bateragarriak.
Argi berdea jaso duen neurri bakarra, erakunde publikoek seinaletika elebiduna orokortzeko aukera da.
Euskal Konfederazioak begi onez ikusi zuen lege proposamena, “onartua izateko ilusiorik” izan gabe. Zinezko aitzinamenduak izateko, Frantziako Gobernuak aurkeztutako lege proiektu “ausart” baten beharra azpimarratu dute, arlo guziak jorratuko lituzkeena.
