Aurtengo Kilometroak, Usurbilgo Udarregi ikastolaren aldeko festa ez ezik, gizarte inklusiboago baten alde lan egiteko parada ere izango da. Izan ere, Kilometroen ingurumarian, parekidetasuna, jasangarritasuna eta inklusibotasuna landu nahi dituzte arduradunek, Gipuzkoa osora hedatzeko xedez.
Ikastolen Elkarteko koordinatzaile Arantza Manterolak adierazi duenez, “Ikastolaren lana ez da ikastolan gelditzen. Jendartean eragiten du”. Hori horrela, oro har gizarteari egin nahi dio ekarpena ikastolak.
Kontzientzia hartzeko lana
Usurbilen hainbat gizarte eragile elkartu dira Kilometroekin eta Udarregi ikastolarekin batera etorkizuneko gizartea balioz hezteko lanean dihardutenak. Helburu horrekin, dekalogo bat partekatu dute.
Dekalogoaren arabera, kontua ez da “pertsona ezberdin horiek jendartean integratzea”, ezaugarri ezberdineko jendearen artean gizarte inklusibo bat osatzea baizik.
Besteak beste, honako eragile hauek etorri dira bat dekalogoarekin: Ikastolen Elkartea, Kontseilua, Mondragon Unibertsitatea, Gipuzkoako Foru Aldundia, Usurbilgo Udala, Aspace, Atzegi eta Caritas.
