Europako Batzordeak ikertuko du ea Gipuzkoa gai den hondakinei buruzko Europako araudia betetzeko, behin Zubietako errauste planta egiteko proiektua bertan behera utzi eta gero. Janez Potocnik ingurumen komisarioak iragarri du, EAJko europarlamentari Izaskun Bilbaoren galdera bati erantzunez. "Europako Batzordeari ez zaio jakinarazpenik helarazi Gipuzkoako hondakinen kudeaketarako 2002-2016 epealdirako planaren aldaketen inguruan", erantzun du komisarioak. Azaldu duenez, araudiak dio planetan eta programetan "moldaketa nabarmenak" badaude horien berri ematea "derrigorrezkoa" da.
EAJk ohar batean azaldu duenez, Gipuzkoako Foru Aldundiak errauste plantako lanak bertan behera geratu zituela jakinarazi zuen Europako Batzordean 2012ko abenduan. "2013ko otsailean aldundiak Inbertsioetarako Europako Bankuari ahoz esan zion inbertsioak ez zirela egingo eta enpresa eraikitzaileekin negoziatu beharra zegoela". EAJren arabera, Inbertsioetarako Europako Bankuak ez du negoziaketa horien berririk jaso.
