Kasua 2011koa da, eta AP-1 autobideko lanei dagokie. Eraikitzaile batzuekin kontratua sinatu zuten lanak egiteko, eta ordaindu ere bai, baina azaroan egiaztatu zuten egin gabe daudela lanak. Larraitz Ugarte Gipuzkoako Foru Aldundiko bozeramaileak esan duenez, EAJko eta PSE-EEko kide "nabarmenak" daude lanak egiteko dirua jaso zuen ingeniaritza enpresako administrazio kontseiluan.
Diputazioak Agustin Zugasti Arizmendiarrieta Bidegiko zuzendari tekniko ohia, Juan Bautista March Fabregues obra zuzendaria eta Laurena aldi baterako enpresa elkarteko zuzendari Ivan Fernandez de Landa Bercedo eraman zituen auzitara, eta epaileak inputatu egin zituen. Auzia ikertzen ari da Azpeitiko Epaitegia.
Ugartek Kutxabankeko ordainketen auziarekin lotu du AP-1eko lanetan gertatutakoa; esan duenez, bien jatorrian "idatzi gabeko itunak" daude ordezkari politikoak enpresa pribatuetan kokatzeko: "Cabiecesen kasuan, [Mario Fernandezek] oso argi azaldu du zein den metodologia. Eta guk ikusi dugu gure kasuan metodologia bera erabili dela. Bestela, ulertezina da administrazio kontseilu batzuen osaera".
