ELAk eta LABek jakinarazi dute "beste aukerarik ez badago" ez dutela baztertzen muga gabeko greba bat egitearen ideia. Hala ere, erabakia oraindik ez dagoela hartuta gogorarazi dute. Iñigo Zubeldia ELAko bozeramaileak nabarmendu du grebari dagokionean, guztia "oso ongi" joan dela, hasieran zaharren egoitzetako langileek "beldur" pittin bat zutela, egungo egoeran greba bat ongi edo gaizki joan daitekeelako, baina oso ongi joan dela.
Atzo elkarretaratzea egin zuten Donostian, lan erreformaren baldintzak ez ezartzeko eskatuz. Gaur ere hala egingo dute.
Atzo langileen %95ek grebarekin bat egin zutela adierazi zuten. Sindikatuetako ordezkariak "harro" agertu dira erantzunarekin. Iñigo Zubeldia ELAko ordezkariak argitu zuen sektorean dauden 3.800 langileetatik %66 gutxieneko zerbitzuetan egon zirela eta mila langile greban. Haren arabera, gutxieneko zerbitzuetan 650 lagun inguru egon ziren, baina haien asmoa greba egitea zen.
Grebaren lehen egunean sindikatuek ziurtatu zuten grebaren erantzuna %93 izan zela eta horien ia %100 protestan aritu zirela. Adegiren arabera, aldiz, %5eko erantzuna izan zuen.
