Europako Giza Eskubideen Auzitegiak Parot doktrinaren inguruan emandako ebazpenarekin bat etorri da Politika Kriminaleko Ikasketa Taldea, 200 magistratu, fiskal, katedradun eta abarrek osatua. "Ez dago demokraziarik legearekiko mendekotasunik gabe", ondorioztatu dute.
Epaia eta auzitegiaren zilegitasuna bera defendatu dute, eta argudiatu "Europako nortasunaren ikurretako bat" dela Estrasburgoko epaitegia. "Eskubideen alorrean diskurtso sinplista eta atzerakoien tonua eta edukia deitoratzen ditugu", azaldu dute.
Juristen ustez, diskurtso juridiko "arrazionalizatzailea agortzen" ari da, eta hura ordezkatu du diskurtso "beliko, mendekuzale eta zakarrak".
