Espainiako Poliziak jakitera eman duenez, joan den asteazkenean, urtarrilaren 31n, 23 urteko gizon baten Beasaingo (Gipuzkoa) etxean sartu ziren epailearen baimenez, miaketa bat egiteko. Aurrez, poliziaren ziberdelinkuentzia unitateak detektatua zuen, hain zuzen, eduki pedofiloak deskargatu eta zabaldu zituela. Hala, mutilaren etxea miatu zutenean, haren sakelako telefonoan haur pornografiako edukiak topatu zituzten.
Orduan, poliziek mutila atxilotu zuten, eta Tolosako epaitegiaren esku utzi; orain, hango epaileek ikertuko dituzte gertaerak.
Oharrean, Espainiako Poliziak azaldu du atzemandako bideo horietan adingabekoak agertzen zirela helduekin harreman sexualak izaten; «indarkeria handiko bideoak» direla esan dute.
Igandean bertan Ertzaintzak jakinarazi zuen joan den ostiralean 51 urteko gizon bat atxilotu zuela Erandion (Bizkaia), haur pornografiako delitu bat egotzita. Atxilotuak aurrekariak ditu sexu abusuagatik, exhibizionismoagatik eta adin txikikoen kontrako jazarpenagatik, eta haren etxea miatu zutenean estupefazienteak ere topatu zituzten.
