Gizon bat atxilotu du Frantziako Poliziak Bidarten (Lapurdi) haren andrea hiltzen saiatzea egotzita. Atxiloaldian da gizona. Baionako prokuradore Jerome Bourrierek BERRIAri baieztatu dionez, ehizarako arma batekin saiatu zen haren bikotekidea hiltzen, iragan larunbatetik iganderako gauean. Emakumea ospitalean dago zauriturik, baina «haren bizia ez da arriskuan», Bourrieren arabera.
Duela hamar egun Miarritzen (Lapurdi) jazo zen aurten Euskal Herrian gertaturiko hirugarren hilketa matxista. Hildako emakumearen eta gizonezkoaren gorpuak atzeman zituzten, Miarritzeko euren etxean, indarkeria zantzuekin. Prokuradoreak baieztatu zuen gizonezkoak emakumea hil izanen lukeela lehenik, tiroz, eta ondotik bere buruaz bertze egin. Miarritzeko Agilera auzoan gertatu zen hilketa, eta ikerketa Frantziako Poliziak Miarritzen duen polizia etxearen esku utzia dute. Zabaldutako informazioaren arabera, gizonezkoak «ehizarako arma bat» erabili izanen luke emaztea lehenik eta ondoren bere burua hiltzeko. 2003tik indarkeria matxistaren ondorioz hildako 110. emakumea da, eta aurtengo hirugarrena.
