Donostian, sexu erasoa jasan duen adingabeak atzo aurkeztu zuen salaketa, eta handik ordu gutxira atxilotu zuten gizonezko gaztea. Ertzaintzaren arabera, astelehen gauean jazo zen erasoa, Donostiako etxebizitza batean. Atxilotua epailearen esku utzi du Poliziak gaur, 18:00ak aldera. Hark, ordea, atxiloaldia luzatzeko agindua eman du, eta Ertzaintzaren zaintzapean geratu da berriz 18 urteko atxilotua. Bihar dira eramatekoak berriz epailearengana.
Donostiako Udalak erasoa gaitzetsi du, eta Eneko Goia alkateak adierazi du gertakariak "oso larriak eta guztiz onartezinak" direla. Bihar eguerdian elkarretaratzea egingo dute udaletxe aurrean, eta bertara batzeko deia egin die herritarrei.
Bestalde, Gasteizko Udaltzaingoak 38 urteko gizonezko bat atxilotu du, neska gazte bati ukituak egitea egotzita. Udaltzaingoko iturriek adierazi diotenez, gizonezkoak astearte gauean egin zizkion ukituak neskari, 23:30ak aldera, gaztea bere familiarekin batera paseatzen ari zela. Gizonezkoak ihes egin zuen segidan, baina biktimaren senideek minutu gutxi barru atzematea lortu zuten, eta atxikita mantendu zuten udaltzainak iritsi arte. Erasotzailea epailearen esku utzi dute gaur goizean.
