Tiroketa izan da Kasedan (Nafarroa), eta hiru lagun hil dituzte. Hildakoak 50 urteko gizonezko bat eta haren bi seme dira; 29 eta 17 urtekoak. Nafarroako Gobernuak jakinarazi duenez, 18:50 aldera jaso dute abisua, eta anbulantziak, Zangozako (Nafarroa) osasun zerbitzuak eta Foruzaingoa bertaratu dira.
Poliziaren arabera, liskarrean parte hartu duten hiru lagunek ihes egin dute, baina Foruzaingoak errepidean gurutzatu ditu. Norabidea aldatu, eta NA-132 errepidean jarraika hasi zaie polizia. San Martin Unxen (Nafarroa) atxilotu dituzte. Atxilotuak 53 urteko gizonezko bat eta haren bi seme dira; Foruzaingoak jakinarazi duenez, Estellerriko herri batekoak.
