43 urte zituen, eta senegaldarra zen jatorriz. Ondarroako Egidazu kaian zebilen, paseatzen, nahiz eta olatu handiak daudenean portuko arduradunek itxi egiten duten barra puntaraino joateko bidea. Gizonak, ordea, aurrera egin du barra puntara joateko bidean; olatuak gainez egin eta uretara bota du, portuaren muturreko bihurgunearen inguruan zegoela.
Ertzaintzak jakinarazi duenez, 10:45ean jausi da gizonezkoa uretara. “Gurutze Gorriaren bi txalupa eta Ertzaintzaren helikoptero bat bertaratu dira”. Ondarroako portuaren eta Saturraran hondartzaren artean aurkitu dute Gurutze Gorrikoek. Uretatik atera eta portura eraman dute. Medikuak saiatu dira suspertzen, baina ezin. Portuko langileen esanetan, gizonezkoak “denbora asko” egin du uretan.
