Donostiako 1. Instrukzioko Epaitegiak fidantzarik gabe espetxera bidali du asteazkenean Donostian izandako hilketan parte hartu zutelakoan Ertzaintzak atxiloturiko bi gizonetako bat, eta bestea aske utzi du, behin-behinean eta noizbehinka epaitegira joateko betebeharrarekin.
Gizonetako batek 54 ditu, eta besteak, 53; asteazken goizaldean atxilotu zituzten, beste baten heriotzarekin zerikusia dutelakoan. Gizon hori hilda aurkitu zuten, Antigua auzoko Mikelete pasealekuko etxebizitza batean, «kriminalitate zantzu agerikoak» zituela. Bizilagunek liskar bat izan zela ohartarazita bertaratu ziren ertzainak, eta iritsi zirenean aurkitu zuten hilotza.
Lekukoek berri agentziei azaldu dietenez, hilda aurkitu zuten pertsona hori han bizi omen ozen, alokairuan, jabearekin —gizonezko horixe espetxeratu dute— eta beste atxilotuarekin batera, eta aurretik ere liskarrak izanak zituzten. Azaldu zutenez, jabeak etxebizitza uzteko eskatu zion, baina ez zuen lortu, eta alde egiten ez bazuen hil egingo zuela mehatxu egin omen zion aske geratu berria den beste atxilotuak.