Iruñeko Kale Nagusian sute bat jazo zen herenegun gauerdian, eta Polizia ikertzen ari da indarkeria matxistako kasu bat izan den. Sua etxe batean piztu zen, eta garrek eragindako erredurekin eraman zituzten ospitalera bertan bizi ziren bi pertsonak, ikertzen ari diren gizona eta haren bikotekidea, emakumezko bat. Zaragozara (Espaina) eraman behar izan zuten andrazkoa, erredura larriekin. Gizona Iruñeko Ospitale Gunean dago.
Beste lau lagun ere medikuek artatu behar izan zituzten kea arnastu zutelako; tartean inguruko hiru bizilagun zeuden, eta Iruñeko udaltzain bat. Kasuaren ezaugarriei erreparatu, eta ikerketa bere gain hartu zuen instrukzio epaileak atzo bertan erabaki zuen genero indarkerian espezializatutako auzitegi batera bideratzea.
