Eskuineko eskua Espainiako Konstituzioaren ale baten gainean, eta ezkerrekoa Biblia baten gainean, gurutze baten aurrean egin du zina Rajoyk.
Iragarri zuenez, ostegun arratsaldean jakinaraziko du nortzuek osatuko duten gobernua, eta horiek larunbatean egingo dute karguaren zina.
Larunbatean, gehiengo soila eskuratu zuen Rajoyk inbestidura saioan. PP, C's eta CCren 170 diputaturen babesa jaso zuen, eta kontrako 111 boto; tartean, PSOE eta PSCko hamabost diputaturenak.
Rajoyz gain, PSOE izan zen eguneko protagonista. Eguerdian, Pedro Sanchez idazkari nagusi ohiak diputatu akta utzi zuen, eta arratsaldeko bozketan, agerian geratu zen alderdiaren zatiketa. Carlota Merchan Madrilgo zinegotziak ordezkatuko du Sanchez kongresuan. Bestalde, Mario Gimenez PSOE zuzentzen ari den gestorako bozeramaileak esan du "patxadaz" ari direla egoera aztertzen, boto diziplina apurtu zutenak zigortuko ote dituzten erabakitzeko.
