Etxerat-ek salatu duenez, Salamancako Topaseko kartzelarako bidean (Espainia) izan dute istripua Gorka Lupiañez presoaren bi senidek. Heldu bat eta adingabe bat zihoazen istripua izan duen autoan. Etxerat-ek salatu du urteko seigarren ezbeharra dela, "hirugarrena hil honetan".
Hori horrela, protestak antolatu dituzte datozen egunetarako Hego Euskal Herriko hiriburuetan: astelehenean, Gasteizen —Andre Mari Zurian— eta Iruñean —Alderdi Popularraren egoitzaren atarian— antolatu dituzte elkarretaratzeak, 20:00etarako; asteartean, Bilbon —Arriagan, 19:00etan—, eta, asteazkenean, Donostian —Bulebarrean, 19:00etan–.
