Euskal Herriko bost elizaberrutietako gotzainek "barkamen zintzoa" eskatu dute ETAk jardun duen urteetan Elizak izandako "konplizitate, anbiguetate eta omisioengatik". Babesa eta elkartasuna agertu diete urte horietan izandako "biktima guztiei"; "bereziki, atentatuak argitu gabe jarraitzen duten eta inpunitatearen min gehigarria pairatzen ari direnei".
Horerz gain, uste dute ETAren desegiteak "normalizaziorako aukera berriak" zabaltzen dituela eta "denek" baliatu behar duela abagune berria. Horren harira, uste dute euskal presoen senideen "eskaera humanitarioei" heltzeko unea dela, "presoak euren jatorrizko herrietara bueltatuz, terrorismoaren biktimak umiliatuak izango ez diren modu batean".
Era berean, elkarbizitza "benetakoa" izan dadin, "berreraikitze moral" bat behar dela diote, "terrorismoaren fenomenoa elikatu zuten ideologia totalitario eta idolatratuak" eragindako mina konpontzeko.
Agiria sinatu dute Iruñeko artzapezpiku eta Tuterako gotzain Francisco Perezek, Baionako gotzain Marc Ailletek, Gasteizko Juan Carlos Elizaldek, Bilboko Mario Izetak eta Donostiako Jose Ignacio Munillak.
