Grande-Marlaskak Ertzaintzari eskatu dio «kautelazko neurriak» ezartzeko

Datorren larunbatean Bilbon egingo den manifestazio nazionalari begira, «kautelazko neurriak» ezartzeko eskatu dio Fernando Grande-Marlaska epaileak Ertzaintzari. Espainiako Auzitegi Nazionaleko epaileak atzera bota du Dignidad y Justicia elkarteak manifestazioa debekatzeko eginiko eskaera. Hala ere, Ertzaintzari eskatu dio manifestazioa «zaintzeko» eta «legez kanpoko aldarrikapenak» egingo balira, manifestazioa «berehala desegiteko». Epailearen ustez, «ezin da alboratu» ekitaldiarekin bat egin duten zenbait eragilek ekitaldia erabil dezaketela «terrorismoa eta terroristak goresteko». Hori hala, «kautelazko neurri batzuk» ezartzea erabaki du. Hala, epaileak dio antolatzaileek eta manifestariek «legeak [presoentzat] aurreikusitako eskubideak aldarrikatu» besterik ez dutela egin behar. Legez kanpokotzat jo du, berriz, presoen argazkiak erakustea eta preso politiko adierazpidea erabiltzea.