Erabakia hartu dute langileek: greba egingo dute bihar Bilboko Metroan. Goizeko bileran erabakitakoa berretsi berri dute arratsaldeko txandan. Zerbitzuen %48 gutxienez eman beharko dituzte bihar. Eusko Jaurlaritzak %70erainoko gutxienekoak ezarri zituen, baina eguerdian EAEko Justizia Auzitegi Nagusiak bertan behera utzi du erabakia, grebarako eskubidea urratzen duelakoan. Agindu du asko jota %48koak izan behar dutela zerbitzuek, eta Jaurlaritzak men egin dio erabakiari, helegitea iragarri duen arren. San Tomas eguna, jendetza izango da bihar Bilbon.
Protestei buruzko asanblada izan dute bi txandatan metroan. Goizean, hiru ordu egin dituzte bilduta ehun langile inguruk, eta erabaki dute greba egitea. Arratsaldean berretsi egin dute erabaki hori. Eta gehiago iragarri dituzte: urtarrilean, ostegunero lanuzteak egingo dituzte: 5ean eta 19an, hiru ordukoak (09:45etik 12:45era), eta 12an eta 26an, bi ordukoak (05:45etik 07:45era). Astearteetan beste era bateko mobilizazioak egingo dituzte
Jaurlaritza ez da konforme gutxieneko zerbitzuak %48 izatearekin. Haren arabera, bihar ezin izango dute bermatu jende oldea metroan ibili ahal izatea; San Tomas eguna dela aintzat ez artesa egotzi dio Jaurlaritzak EAEko auzitegiari. Sindikatuen aurka ere jo du: bidaiariak “bahitu” nahi izatea leporatu die. Erabakiaren aurkako helegitea iragarri du Jaurlaritzak. Gutxieneko zerbitzuak %60an jarri zituen, eta puntako orduetan, %70ean. Auzitegiak dio, ordea, grebarako eskubidea urratzea litzatekeela hori. Lan Sailak auzitegiak ezarritako gehienezko muga bere egin du: zerbitzuen %48 emateko agindu du.
