Lurra erakundeak eta Mallabia, Berriz eta Garaiko alkateek Gueñes (Bizkaia) eta Ezkio-Itsaso (Gipuzkoa) lotuko dituen goi tentsioko linearen aurka agertzeko hautetsien biltzarra antolatu dute larunbat honetarako. Helburua, Gasteiz eta Muru Artederreta (Nafarroa) arteko goi tentsio linearen proiektua geratzea ahalbidetu zuen prozedura errepikatzea da. Hau da, toki desberdinetako hautetsiek sinatutako manifestuaren bidez egitasmoa bertan behera uztea.
Gueñes eta Ezkio-Itsaso arteko lineak 72 kilometroko luzeera izango du, eta 24 udalerriri eragingo die. Horien artean daude Gueñes, Alonsotegi, Arrankudiaga, Arrigorriaga, Ugao-Miraballes, Zeberio, Galdakao, Bedia, Igorre, Lemoa, Zornotza, Iurreta, Garai, Berriz, Mallabia, Zaldibar, Elgeta, Bergara, Antzuola, Legazpi, Zumarraga, Gabiria, Ezkio-Itsaso eta Okondo.
Alkateek salatu dutenez komunikabideengandik jaso dute egitasmoaren berri. Aitor Loiola Mallabiako alkatearen esanetan, lehen ez zegoen linea horren beharrik: "Eta orain askoz gutxiago". Gaineratu duenez, udala zein herritarrak goi tentsioko linearen aurka daude: "1.200 biztanle ditu Mallabiak, eta herritarrek 1.010 alegazio aurkeztu dituzte proiektuaren kontra".
