Eusko Jaurlaritzak eta Nafarroako Gobernuak jakinarazi dutenez, COVID-19arekin eri ziren 31 pertsona hil ziren maiatzaren 24tik 30era, aurreko astean baino bost gehiago. Azken astean birusarekin zendu ziren kasu gehienak (27 zehazki) Araba, Bizkai eta Gipuzkoakoak dira, eta beste lau Nafarroakoak. Hain justu ere, duela bi aste ez zen COVID-19arekin loturiko heriotzarik izan Nafarroan, uztailetik lehen aldiz, baina joan den astean berriro ere izan dira hildakoak herrialdean gaitzaren ondorioz.
Birusaren transmisioari dagokionez, berriro egin dute koska bat gora kasu positiboek. Bi gobernuetako osasun agintariek emandako datuen arabera, atzo 10.678 diagnostiko proba egin ziren Hego Euskal Herrian COVID-19a atzemateko, eta horien guztien %3,9k eman zuten positibo: 426k, alegia. Lurraldeka, atzo detektatutako positiboetatik 178 Bizkaian atzeman ziren; Gipuzkoakoak izan ziren 110; Nafarroan 88 zenbatu zituzten, eta Araban, 45.
