Beren herrietara itzultzeko erabakia hartu duten hainbat iheslari politiko azaldu dira gaur euskal presoen eskubideen eta iheslari eta errepresaliatuen alde Euskal Herriko hainbat herritan egin diren mobilizazioetan. Eskualdeetako elkarretaratze nagusietan agertu dira, taldeka eta herritarrak babestuta. Elkarretaratze horiek baliatu dituzte sorterrira itzuli direla jakinaraztekoa eta egindako urratsaren garrantzia azaltzeko. Konponbidea errazteko balioko duela azpimarratu dute.
Horietako gehienak jaioterrietan geratzeko itzuli dira, beste batzuen kasuan, berriz, sinbolikoa izan da haien itzulera. Helburua, azken finean, iheslari izaerarekin bukatzea dela nabarmendu dute. Haietako batzuk Berria, Urola Kostako Hitza eta Arabako Hitza-rekin izan dira, eta haiek esandakoak bilduko ditu bihar Berria-k. Denera sei iheslari ohiren bizipenak jaso ditu, urteetako eta azken egunetakoak, eta beste baten itzulera bidaiaren kronika. Ihes egin izanaren zergatiez, errefuxiatuen bizimoduaz eta itzulerak eragin dien sentsazioez mintzatu dira Berria-rekin.
