Hutsik zegoen arren, gasolina bidoi barruan pilatutako gasek eragin zuten eztanda atzo gauean Pasaian San Joan bezperan piztutako suan. Ondorioz, sua ematera joan zen 44 urteko gizonezkoak hainbat erredura izan zituen, eta, gainera, eztandaren ondorioz aireratutako egur batek buruan jo zuen.
Gizonezko hori ez ezik, beste lau lagun zauritu ziren Pasaian. Haietako hiru tokian bertan artatu zituzten; beste lagun bat ospitalera eraman zuten, eztandaren ondorioz jasandako zauriak sendatzera.
Zarautzen, gisa berean, beste bi lagun zauritu ziren atzo gauean, eta ospitalera eraman zituzten. Donostia ospitalaren arabera, bost lagunek igaro dute gaua bertan, San Joan bezperako suetan zauritu ostean.
