Guardia Zibilak Nafarroan eta Gipuzkoan hamahiru gizonezko atxilotu ditu, "atzerriko" emakumeak legez kanpo ekarri eta prostituzioan sartzen zituen sare batean parte hartzea egotzita.
Tafallan (Nafarroa) bederatzi lagun atzeman ditu, eta hiru inputatu dituzte. Prostituzioaz gain, droga trafikoa eta adostutako ezkontzak gauzatzea leporatzen diete. Gainontzekoak Lizarran (bi), Donostian (bat) eta Cintruenigon (bat) atxilotu dituzte.
Guardia Zibilaren arabera, emakume brasildarrak ekartzen zituzten, ondoren Nafarroako hainbat klubetan prostituzioan aritu zitezen.
