Atxikimenduak jasotzen jarraitzen du Bilbon larunbatean euskal presoen eskubideen alde egingo duten manifestazioak. Gaur, hamar ikasle sindikatuk adierazi diote babesa Herrira-k antolatutako protestari. "Nazioarteko elkartasuna oinarri, giza eskubideak, irtenbidea eta bakea aldarrikatuko dituen manifestazioan izango gara", adierazi dute ohar baten bidez.
Halaber, Euskal Herriko gatazka politikoa "aitortzeko" eta gatazkaren ondorioak "konponbide bidean" jartzeko eskatu dute. Zehazki, presoak Euskal Herrian izatea, Parot doktrina baliogabetzea eta eritasunen bat dutenak libre uztea galdegin dute.
