Espainiako Gobernuaren Arrantza-ikuskatze Zerbitzuak 16 tona berdel konfiskatu ditu Ondarroan (Bizkaia), kanpaina hasi aurretik arrantzatzeagatik. Asteazkenean hasiko da berdelaren kanpaina.
Espainiako Gobernuaren EAEko ordezkaritzatik jakinarazi dute atzo goizaldean konfiskatu zuten berdela, Ondarroako portuko Andrekala Berria eta Arretxu Berria arrasteontzitan. Konfiskatutako arraina portuko nagusien esku geratu da, eta gaur enkantean salduko dute.
Jon Azkue Eusko Jaurlaritzako Arrantza eta Elikagaien Industriako sailburuordeak berretsi du arrantzaleek bazekitela asteazkenera arte ezin zela berdela arrantzatu.
