Bizkaiko Auzitegian ari dira epaitzen Pannagh kalamu kontsumitzaileen elkarteko bost kide. 2011ko azaroan atxilotu zituzten, droga trafikoa leporatuta.
Martin Barriuso elkarteko presidentearentzat Igor Gaminde diruzainarentzat lau urte eta erdiko espetxe zigorra eskatu du fiskalak droga trafikoa leporatuta, eta beste urte eta erdi "gaizkile taldeko kide" izatea egotzita.
2003an sortu zen Pannagh irabazi asmorik gabeko elkarte gisa, eta 70 kide ditu, elkartearen beraren arabera. 18 urtetik gorakoak dira guztiak, eta 39k zenbait gaixotasunen kontrako tratamenduak eragindako oinazeak arintzeko kontsumitzen zuten kalamua elkartearen kontrako operazioa egin aurretik.
"Txoko kanabiko" gisa definitu zuen Barriusok Pannagh elkartea BERRIAk eginiko erreportaje batean: "Pertsona helduez osatutako elkarte pribatua zen. Kalamuaren inguruko merkatu beltzari bizkarra emateko asmoz, sistema propioa garatua zuen".
