Iruñeko 4. Zigor Epaitegiak 18 eta 6 hilabeteko espetxe zigorra ezarri die eskola publiko bateko ikasle baten aitari eta aitonari, hurrenez hurren, irakasle bat «hertsatzea eta mehatxatzea» leporatuta. Fiskaltzak eta defentsak akordioa erdietsita, auzipetuek ez dute kartzelan sartu beharko.
Epaian esplikatzen denez, bi gizonak ikastetxean azaldu ziren 2023ko urriaren 10ean, eta irakaslea zegoen ikasgelara sartu ziren. Han, «asaldura handiz eta oihuka» oldartu zitzaizkion hezitzaileari: «Zera egozten zioten, goiz hartan besotik heldu ziola ikasleari eta atzamarka egin ziola besoan». Ebazpenaren arabera, haurraren aitak «arrazista» esan zion irakasleari, eta bultza egin zion, eta aitona «tonu erasokorraz» mintzatu zitzaion, eta esan zion «aise txikitzen zituela bera bezalako harroputzak».
Ikaslearen aitak 18 hilabeteko espetxe zigorra onartu zuen epaiketaren hasieran, irakaslea «hertsatzea» eta «atentatua» leporatuta —irakaslea funtzionario publikoa baita—. Aitonari, berriz, sei hilabeteko espetxealdia ezarri diote, mehatxu delitu batengatik.
