Haur eskolan istripua izan du ume batek, eta zainketa intentsiboen unitatean dago

Ume batek istripua izan du Tafallako (Nafarroa) haur eskola batean, eta larri dago, Iruñeko Ospitale Guneko zainketa intentsiboen unitatean. Nafarroako Gobernuak jakinarazi duenez, haurrak 3 urte ditu. Atzo, 11:30 aldera, haur eskolako langileek konorterik gabe aurkitu zuten umea. Burua patioko hesiko bi barra lodiren artean zeukan sartuta. Larrialdietara deitu, eta suhiltzaileak eta Nafarroako Ospitale Guneko larrialdietako talde bat hara joan ziren. Haurra bere onera ekartzeko maniobrak egin ostean, ospitalera eramanzuten, oso larri. Arnasa hartzeko laguntza behar zuen. Pediatriako zainketa intentsiboen unitatean ospitaleratu zuten umea. Foruzainek ikerketa abiatu dute zer gertatu den argitzeko. Besteak beste, haur eskolako arduradunekin bildu ziren atzo.