Hauteskundeetara aurkezteko Aukera Guztiak-ek ETA gaitzetsi beharko duela esan du Espainiako Fiskaltzak

Espainiako Fiskal Nagusi Candido Conde Pumpidok Espainiako RNE irratian egin dituen adierazpenetan esan duenez, "mila biktima eragin dituen terrorismoa kondenatzera ezin daiteke ukatu edozein pertsona zintzo".

Aukera Guztiak hautesle elkartea ikertzen ari direla esan du, eta badituztela zantzuak zerrenda hori "Batasunaren tapakia izan daitekeela diotenak".

Azaldu du, Alderdien Legean "ezinbesteko datua dela zerrendak indarkeriaren alde edo kontra dauden jakitea". Horregatik esan du, "zalantzak daudenean", zerrenda osatzen dutenek beraiek "zalantza horiek baztertzea" dela egokiena. "ETAren diziplinapean ez daudela frogatzeko, aurkezten den zerrendak terrorismoa eta indarkeria gaitzestea da errazena".

Aukera Guztiak zerrendako kideek "gatazkaren inguruan adierazpen generikoak egiten jarraitzen badute, baina terrorismoa gaitzestera ukatzen badira, ziur edukiko dugu terroristak ordezkatzen dituztela", gaineratu du.

"Eskubide urraketa guztien kontra"

Conde Pumpidoren adierazpenei erantzunez, Marije Rodriguez de Lera Aukera Guztiak-en bozeramaileak adierazi du eskubide urraketa guztien aurka dagoela engaiatuta beren hautesle elkartea. "Herritarren eskubide zibil eta politikoen aurka egiten duen guztiaren kontra gaude, eta, halaber, pertsona guztien eskubide zibil eta politikoekin gaude konprometituta", adierazi du.