Hauteskundeetara elkarrekin aurkezteko hizketan ari dira EAJ eta Hamaikabat

Datozen foru eta udal hauteskundeetara elkarrekin aurkezteko asmoz hizketan ari dira EAJ eta Hamaikabat. Hain justu, beren borondatea bozetan jeltzaleekin parte hartzea dela azpimarratu du Iñaki Galdos Hamaikabateko presidenteak, eta bi alderdiek elkarrizketak abiatu dituztela baieztatu du. Nolanahi ere, elkarrizketa horiek ondo joan edo ez, eta hauteskundeetan izateko bide bat edo bestea hautatu, beren asmoa ahalik eta udal gehienetan presente egotea dela adierazi du.

Gasteizen eman ditu azalpen horiek Galdosek, Hamaikabaten batzar nagusiaren harira. Izan ere, urtebete da EAtik banatutako sektoreek alderdi hori sortu zutela, eta iragan den urte horretako jardunaren azterketa egin dute batzarrean.

EAk ezker abertzalearekin egin duen itunaz ere mintzatu da Galdos, eta EA ezker abertzalearen jarreretara lerratu dela iritzi dio.