Aurten 78 irrati lizentzia banatuko dituzte Hego Euskal Herrian. Nafarroako Gobernuak 44 lizentzia banatuko ditu, eta Eusko Jaurlaritzak, 34. Aspaldi zen lizentziarik banatzen ez zela. EAEko azken lehiaketa 1986koa zen, eta Nafarroakoa, 1998koa.
BERRIA Telebistak lehiaketara aurkeztu diren hiru irratitako arduradunak bildu ditu gaur Andoainen, zuzeneko mahai inguru batean. Euskalerria irratiko zuzendari Mikel Bujanda, Antxeta irratiko lehendakari Agus Hernan eta Bizkaia irratiko zuzendari Jabier Onaindia izan dira solaskideak.
Bujandak aipatu du lizentzien banaketa testuinguru batean kokatu beharko litzatekeela, eta uste du nora joan nahi den eta zein eredu bultzatu nahi den definitu behar dela.
Onaindiak, berriz, proiektu berrien gainetik martxan daudenak bultzatzeko eskatu du, egonkortasun bat lortzea ezinbestekoa delakoan.
BERRIAk Komunikazio sailean erreportaje-elkarrizketa sorta bat argitaratu du gaiaz.
