Nafarroa Aldatu Ahal Dugu, %100 ADN Podemos eta Nafarroak Ahal Du. Hiru hautagaitza horietako batek zuzenduko du Ahal Dugu Nafarroan, eta gaur hasiko dira militanteak botoa ematen. Ostiralera arteko epea izango dute, eta larunbatean emango dute zerrenda irabazlearen berri.
Nafarroako Idazkaritza Nagusia, Nafarroako Herritarren Kontseilua eta Bermeen Batzordea izango dira aukeratu beharrekoak: Laura Lucia Perez da Nafarroa Aldatu Ahal Dugu-ko hautagaia idazkari nagusi izateko; Joan Josep Bosch Nafarroak Ahal Du-koa, eta Sandra Gonzalez Ortega %100 ADN Podemosekoa.
Euskal Autonomia Erkidegoan ere postu berberak dira aukeratzekoak, epe berberetan. Hautagaitzak, berriz, hauexek: Roberto Uriarte buru duen Euskal Hiria, Iratxe Osinagaren Euskadi Baita Ere eta Luis Angel de Lachinaren Orain Ahal Dugu. Espainiako Podemoseko zuzendaritzak ez du hautagaitzarik babestu, nahiz eta hiru zerrendek adierazi dioten atxikimendua Espainiako zuzendaritzaren ildoari.
