Hendaia, Urruña eta Biriatuk osatzen dute Hendaiako kantonamendua, eta 27.000 herritar bizi dira bertan. Sei ordezkari dira parte hartzaileak: Kotte Ezenarro (ezkerreko batasuna), Battitt Salaberri (eskuineko independentea), Dominique Mele (alderdi komunista), Sandrine Urtxuegia (UMP), Jean Telletxea (EAJ) eta Pantxo Tellier (EH Bai).
Alor soziala izan dute hizketagai eztabaidaren lehen zatian, besteak beste gazteen eta adinekoen arazoak jorratuz. Gazteen mobilitatea lagundu beharraz mintzatu da Mele, eta haientzat etxebizitzak eta formakuntza segurtatu behar direla uste du Salaberrik.
Telletxea: RSArekin txeke bat ematen diegu prekaritatean diren jendeei baina ez ditugu laguntzen #bozak15pic.twitter.com/pRCzqj1NcV
— Euskal Hedabideak (@EuskalHedabide) March 9, 2015Ipar Euskal Herriko herri elkargoarekiko jarreraz ere galdetu diete hautagaiei. Pays egitura baten alde azaldu da Mele, eta EPCI baten alde, ordea, Ezenarro. Urtxuegiak garrantzitsutzat jo du instituzio berezi bat osatzea, eta Salaberrik nabarmendu du lurralde kolektibitatea "zuzenbide publikoan sartzea" dela.
Tellier: Biarnoak Pays de BIgorrekin eginen duenak EHrentzat onurak izanen ditu #bozak15pic.twitter.com/ukBG6wfaax
— Euskal Hedabideak (@EuskalHedabide) March 9, 2015Mugaz gaindiko harremanez ere itaundu dituzte hautagaiak. Salaberriren ustez, diskurtso anitz eta gauza guti egin dira mugaz gaindiko harremanetan, batez ere unibertsitateekin. Tellierren ustez ere ez da aski egin alor horretan, eta erantsi du: "Pauetik erdaraz egiten dira harremanak". Bestela uste du Ezenarrok, gauza anitz egin direla ohartarazi baitu. Mugaz gaindi euskara sustatzearen alde mintzatu da, berriz, Urtxuegia.
Hurrengo eztabaida martxoaren 17an egingo dute Uztaritzen, 19:00etan. Lehen mahai inguruan, Mendialdeko boz eremu berriaz aritu ziren eztabaidan martxoaren 4an. Olivier Carasco (UMP), Itxaro Bethart (EAJ), Leonie Agergarai (EH Bai), Pierre Etxekopar (Ezkerreko Frontea), Pepela Mirande (Eskuineko independenteak) eta Ruben Gomez (Ezkerreko independenteak) izan ziren hizlariak, eta herri elkargoaren "aukera" baliatzera deitu zuten hautagaiek.
Euskal Irratiak, Kanaldude, BERRIA-Iparraldeko Hitza,Herria eta Kazeta.eus hedabideek antolatu dituzte departamentu bozei buruzko eztabaidak. Iaz ere elkarlanean aritu ziren euskal hedabideak Ipar Euskal Herrian, udal bozak zirela eta. Elkarlan hori saritu zuten urtarrilean Argia sarietan.
