Baztango eta Elizondoko alkateei bidalia da gutuna, eta bertan esaten da bi alkateak "heriotzara zigortzea" erabaki zutela joan den uztailaren 13an egindako bilera batean, Espainiako Banderen Legea bete ez eta festetan "aldarrikapen politikoak" egiteagatik. Astebeteko epean ikurrina eta euskal presoen eskubideen aldeko ikurrak kendu ezean "erabaki" hori gauzatzeko mehatxua egin diete Garbiñe Elizegi Eeta Mikel Sobrino alkateei. Dagoeneko jarri dute salaketa polizia etxean.
"Tinko jarraituko dugu"
EH Bilduko Bakartxo Ruizek adierazi du "eskuin zaharkituaren joko demokratikoak onartzeko ezintasuna" islatzen dutela jarrera horiek. Gogora ekarri du azken hilabeteetan ugaritu egin direla EH Bildu legez kanpo uzteko mehatxuak, baita "kasu honetan bezala, errekete berriek" egindako heriotza mehatxuak ere. Besteak beste, 2011ko abuztuan Andoaingo eta Lasarteko udaletan ere (Gipuzkoa) jaso zituzten heriotza mehatxuak.
UPNri, PSNri eta PPri dei egin die gertaera horiek salatu ditzaten. "Giza eskubideen eta eskubide zibilen defentsak bazterketarik eta salbuespenik gabea izan behar du", esan du. "EH Bilduko kargu instituzionalen apustua garbia da: mehatxu buztien gainetik gure lanean tinko jarraituko dugu".
