Gaur aurkeztu dute urriaren 10ean eta 11n egingo duten Bakearen aldeko Alkateen Konferentzia. Behin-behineko egitaraua aurkeztu du Donostiako alkate Juan Karlos Izagirrek eta jakinarazi du bertan izango direla munduko hainbat lekutako alkateak
Iroshiman (Japonia) aurkeztu zuen konferentzia Izagirrek, eta gaur eman ditu biltzarraren inguruko xehetasun gehiago. Hiru atal izango ditu: aurkezpena Aieteko Jauregian egingo dute, eta erakundeetako ordezkariez gain, bertan izango da Carlos Villan Duran, Giza Eskubideetarako Nazioarteko Zuzenbiderako Espainiako Elkarteko presidentea.
Lehen lantaldea Kursaalean elkartuko da, eta gatazken konponbideetan aditu diren hainbat lagun elkartuko ditu. Bigarrenean, berriz, gatazkan bizi diren hainbat hiritako alkateak batuko dira. Horien artean izango dira Osman Baydemir Diyarbakir Turkiaren mendeko Kurdistango hiriburuko alkatea eta Dajlako (Sahara) gobernadorea.
Gatazkak gainditu dituzten hirietako alkateak elkartzea izango du xede hirugarren lantaldeak. Belfast (Irlanda iparraldea), Durban (Hegoafrika) eta Cochabambako (Bolivia) alkateek bat egingo dute lantalde horretan. Horiek ez ezik, Boise (AEB), Rosario (Argentina) eta Bartzelonako alkateek ere hartuko dute parte gatazken konponbiderako ekinaldi ugariren sustatzaile gisa.
Izagirrek azaldu duenez, "denok dugu eskaintzeko zer edo zer, eta ikasteko asko". Vicente Zaragueta konferentziaren batzordeko buruak, berriz, erantsi du bakea "azkeneraino" eraman behar dela, "Euskal Herriarentzat eta Espainiarentzat ona delako".
Biltzarrean parte hartzeko izena eman dezakete erakunde soziopolitikoek eta unibertsitate ikasleek, donostiapeace.com webgunean.
