Espainiako Auzitegi Nazionalean aurrera doaz herriko tabernen auziko edo 35/02 auziko tramiteak. Auzitegiko Bigarren Zigor Salak onartu egin die ehundik gora herriko tabernari bakoitzak bere defentsa propioa edukitzeko eskubidea, hasiera batean guztiak abokatu bakarrak eta taldean defendatu beharko zituela esan zuen arren. Taberna horiei bost eguneko epea jarri die beren defentsa aurkez dezaten.
Gauzak horrela, Auzitegi Nazionalean ate-joka dago 35/02 sumarioko epaiketa. Batasuneko kide izanda herriko tabernak baliatuz ETA diruz hornitzea egozten die fiskalak 40 laguni. "ETAren enpresa handi bat" izatea egotzita abiatu zuen auzia Baltasar Garzon epaileak 2002an, eta epaiketarik ez da egin oraindik orain. ETAko kide izatea egotzita epaituko dituzte. Auzia abiatu zuenean, Batasunaren egoitza guztiak ixteko agindu zuen Garzonek.
