Eusko Legebiltzarrak ekimen bat onartu du gaur goizean, Espainiako Gobernuari eskatzeko bertan behera utz dezala hezkuntzan egitekoa den erreforma. Jose Ignacio Wert Hezkuntza ministroak prestatutako lege proiektua "banatzailea eta birzentralizatzailea" dela kritikatu du ganberak, eta atzera egiteko eskatu dio.
EAJk eta PSEk babestu dute ekimena. EH Bildu abstenitu egin da, eta adierazpenaren aurka agertu dira PP eta UPD. Testuaren arabera, erreformak murriztu egingo du Eusko Jaurlaritzaren erabakitzeko ahalmena, eta autsi egingo ditu "30 urte baino gehiago iraun duten hizkuntza adostasunak". Gainera, EAJk eta PSEk salatu dute lan heziketari balioa kenduko diola erreformak.
