ELA, LAB eta EILAS sindikatuek Jose Ignacio Wert Hezkuntza ministroak aurkeztutako LOMCE aurreproiektuaren balorazioa egin dute gaur goizean, Bilbon. Euskal Herriarentzako erasotzat jo dute hezkuntza erreforma, eta "inposatzailea, zentralizatzailea, uniformatzailea, espainolizatzailea, atzerakoia, doktrinatzailea, segregatzailea eta elitista" dela salatu dute.
Nafarroako Gobernuari, Eusko Jaurlaritzari eta alderdi politikoei eskatu diete murrizketa politikei eta lege aurreproiektu horri "aurre egiteko" eta "ez ezartzeko". Era berean, gizarte osoari dei egin diote "herriak nahi eta behar duen hezkuntza indartzeko eta Euskal Herrian erabaki eta eraiki dadin pausoak emateko".
Euren interpretazioa hezkuntzako gainerako eragile eta erakundeekin elkarbanatu eta lantzeko konpromisoa hartu dute hiru sindikatuek, baita "erasoaren tamainako erantzuna antolatzekoa" ere. Hartara, eragile eta herritar guztiei dei egin diete, "atzerapausoak salatu" eta egingo diren ekitaldietan aktiboki parte hartzeko.
