Hezkuntzan eta ikerketan Euskal Autonomia Erkidegoak dituen eskumenak defendatzeko eskatu dio Iñaki Goirizelaia EHUko errektoreak Iñigo Urkullu Eusko Jaurlaritzako lehendakariari. Horretarako, unibertsitate arloko eragile guztien babesa adierazi dio.
Gaur izendatu dute Goirizelaia EHUko errektore, bigarren aldiz. Gasteizen egin dute ekitaldia, Ajuria Enean. Iazko abenduaren 4an irabazi zituen hauteskundeak, beste lehiakiderik ez zuela. Goirizelaiak oroitarazi du EAEko autonomia estatutuan ageri dela hezkuntza eta ikerkuntza Jaurlaritzaren eskumenak direla, eta gaineratu du Espainiako Gobernuaren hainbat dekretuk eskumen horren aurka egiten dutela.
Urkulluk, bestalde, adierazi du hezkuntza eskubide bat dela eta berak zuzentzen duen gobernuak ez diola uko egingo eskubide horri. Gainera, hezkuntza alorreko langileei eskatu die "gazte batek unibertsitateko ikasketak hasten dituen ilusio berarekin" lan egiteko, "zailtasunen gainetik".
