Baionako PSren egoitza barruan jarraitzen du atzo arratsean bertara sartu zen Seaskako guraso eta ikasle taldeak. Colette Capdevielle PSko diputatuak goiz honetan erran die Frantzaiko Hezkuntza Ministerioa Seaskarekin batzartzeko prest dagoela. Ez du datarik jarri, ordea. Ministerioarekin bilera ziurtatu eta lotu arte okupazioarekin jarraituko duela berretsi dute Seaskako kideek.
Atzo 17:30 aldera sartu ziren Ipar Baionako PSren egoitzan. Hogeita hamar bat pertsona ziren. Lege bat ikastolentzat! leloa idatzia zuen pankartarekin sartu ziren barrura. Gaua egoitza barruan eman dute hamabost bat pertsonek. Goizeko zazpietan Baionako sozialisten diruzain Christian Muratek egoitzatik "alde egiteko" eskatu dio taldeari. Ostantzean, Muratek jakinarazi die Alderdi Sozialistako departamentuko Patrice Laurentek salaketa ezarriko duela.
Seaskak herritarren sostengua eskatu du, eta Baionako Gaskoinen plazara hurbiltzeko gomita zabaldu. Hur Gorostiaga, Seaskako zuzendaria, PSri mintzatu zaio: "Bi aterabide dituzte; konponbide bat lortu edo egoera gehiago okertu, salaketa ezarriz eta poliziak igorriz".
Gorostiagak "lehen bidea" lortzeko nahia azaldu du. Aldi berean, jakinarazi du François Hollande presidentearekin edo Vicent Peillon Hezkuntza ministroarekin hitzordurik lortu arte ez direla beren gisaz mugituko.
