Hiesari aurre egiteko sexu heziketak duen balioaz ohartarazi dute

Hiesaren aurkako nazioarteko egunaren harira, ekimenak izan ziren atzo Euskal Herri osoan. Infekzioari aurre egiteko sexu heziketak duen garrantziaz ohartarazi zuten horietan. Hala, heziketa hori eskola curriculumetan txertatzea exijitu dute.

Nafarroako Nasida plataformako Julia Munarrizen ustez, prebentzioan ez da behar besteko arreta jarri, eta ez du behera egin azken urteetan infekzio kopuruak. Horregatik, Nafarroako Gobernuari zuzendu zaio, «egun bat gehiago itxoin ez dezan» etasexu heziketabultza dezan.

Era berean, hiesa duten pertsonek jasaten duten diskriminazio eta estigma sozialarekin bukatzeko lana egitera deitu du Munarrizek: «Oraindik daukagun erronka da». Hala, gaixotasuna duten pertsonek lanerako, etxebizitzarako, bizitza aseguruetarako eta harreman sexualetarako gainerako pertsonen eskubide bera dutela gogorarazi du.

Gainerako hiriburuetan ere izan ziren ekimenak. Donostian,goizean mahai informatiboak jarri zituzten, eta arratsaldean elkarretaratzea egin zen. Bilbon ere karpa bat jarri zuten, eta Gasteizen Araba Hiesaren aurkako elkarteak urteroko ekitaldia egin zuen Montehermoson. Baionan, berriz, Babestu + Diagnostikatu + Tratatu = Hiesaren amaiera leloa erabili zuten ekitaldietan.