GI-3661 errepidean gertatu zen ezbeharra atzo, Etumeta eta Erdoizta arteko bidegurutzean, Errezilen (Gipuzkoa). Eusko Jaurlaritzako Segurtasun Sailak jakinarazi duenez, 13:00 aldera, bi autok elkar jo zuten, eta haietako bat malda batean behera amildu zen. Lekuan bertan hil zen bidaiarietako bat, 78 urteko andrazkoa.
Oso larri eraman zuten autoan zihoan hamasei urteko haurra Gurutzetako erietxera (Barakaldo, Bizkaia). Gaur eguerdian hil dela jakinarazi dute ospitaleko iturriek. Beste lau lagun ere zauritu ziren ezbeharrean; Gurutzetan dauzkate bi, eta beste bi, Donostian.
